تیری خوش فہمی کہ دنیا ہے تری مٹھی میں
گھٹ کے مر جائے گی اک دن یہ خوشی مٹھی میں
سب تہی دست گئے آیا بلاوا جس دم
زندگی ریت ہے ٹھہری نہ کبھی مٹھی میں
دیدہ ور ہم تھے مگر کون لکیریں پڑھتا
گرچه قسمت کا لکھا لائے سبھی مٹھی میں
مفت ملتی نہیں بازار میں یوں جنسِ وفا
کھوٹے سکے لیے پھرتے ہیں سبھی مٹھی میں
چاندنی چھٹکی تو یہ بھید کھلا ہے ہم پر
کتنے ہی چاند ہیں فطرت کے ابھی مٹھی میں
کھول کر مٹھی ہمیں شوٹ دکھاتا ہی نہیں
سنگ ریزہ ہے کوئی یا ہے کلی مٹھی میں
اس کی نازک سی کلائی بھی توانا ہے مگر
دل مچل جائے گا آیا جو کبھی مٹھی میں
کتاب: خواب دیکھا نہ کرو
شاعر: حسن عسکری کاظمی
